樂珈嘉自無綫藝員訓練班畢業入行，曾參與《反黑英雄》、《巨塔之後》及《正義女神》等大製作。不過近期鮮見其踪影，佢昨日（9日）突然喺IG宣佈放棄演員身份，並透露已隻身北上加拿大，嚟到全新生活，令網民驚訝。
樂珈嘉坦言，完成《正義女神》拍攝後便下定決心離港，至今已在加拿大生活近一個月。面對放棄剛起步嘅藝員路，佢心態顯得十分豁達，希望發掘未來嘅無限可能性。佢喺片中貼出昔日演出片段，一臉從容表示：「冇錯，我放棄咗香港演員呢一個身份。其實喺入行第二年，我就攞到咗一個可能好多人做咗10年都未必有嘅機會。但係拍完呢一套戲之後，我就決定放棄……好多人會覺得，留喺原地唔郁就最安全。當你成日驚失去而家擁有嘅嘢，就唔敢踏出嗰一步，其實你已經失去一個『未來』。」
佢續稱，以前常自我懷疑：「我以前成日覺得，我書都讀唔好就死梗㗎啦，搵唔到條啱嘅路畀自己行，搵唔到份好嘅工畀自己做。因為我啲成績唔好、畢唔到業，就唔會有人請。但其實唔係㗎，呢個世界真係好大！當你決定將手上擁有嘅嘢一切歸零，你會發現『We've got nothing to lose』。因為當你乜嘢都冇嘅時候，你行嘅每一步都係賺㗎！」佢藉此勉勵大家勇敢走出舒適圈，追尋夢想。
目前喺加拿大讀心理學課程嘅樂珈嘉，追夢之路唔係咁順。佢曾同時做過婚禮助手、餐廳侍應同模特兒，甚至曾經做過「譚仔姐姐」。當年喺米線店工作時，因節奏急促同面對嚴苛客人，曾心碎到一度想躲起來痛哭，不過佢將呢啲經歷視為演戲嘅寶貴經驗。
自3歲開始學跳舞，精通中國舞、拉丁舞等七種舞種。13歲時已立志當演員，並入讀第32期無綫藝員訓練班。2024年喺《巨塔之後》中飾演「繼母」嘅劉佩玥賞識佢，上契成為契女。雖然《正義女神》中嘅「巨嬰式無助喊戲」曾被網民批評，但總監製鍾澍佳指佢演得唔錯，成功塑造出缺乏安全感嘅角色。如今佢選擇喺上位期退出幕前，雖令觀眾惋惜，不過亦有祝福佢嘅勇氣。
